TAJ MAHAL.........SAHIR LUDHIANVI

TAJ TERE LIYE EK MAZHAR-E-ULFAT HI SAHI
TUJH KO IDD VAADI-E-RANGEEN SE AQEEDAT HI SAHI
MERI MEHBOOB KAHIN AUR MILA KAR MUJH SE

BAZM-E-SHAHI MEIN GHAREEBON KA GUZR, KYA MAANE?
SABT JIS RAAH PE HON SITOOT-E-SHAHI KE NISHAN
USS PE ULFAT BHARI ROOHON KA SAFAR, KYA MAANE?

MERI MEHBOOB! PAS-E-PARDA-E-TASHHEER-E-VAFA
TU NE SITOOT KE NISHANON KO TAU DEKHA HOTA
MURDA SHAHON KE MAQAABIR SE BEHALNE WALI
APNE TAAREEK MAKAANON TAU DEKHA HOTA

ANGINAT LOGON NE DUNIYA MEIN MOHABBAT KI HAI
KAUN KEHTA HAI KE SADIQ NA THE JAZBE UNN KE
LEKIN UNN KE LIYE TASHHEER KA SAAMAN NA THA
KYUNKE WOH LOG BHI APNI HI TARAH MUFLIS THE

YEH IMAARAT-O-MAQAABIR, YEH FASEELEIN, YEH HISAAR
MUTLAQ-UL-HUKM SHAHSHAHON KI AZMAT KE SUTOON
SEENA-E-DAHAR KE NASOOR HAIN, KOHNA NASOOR
JAZB HAI INN MEIN TERE AUR MERE IJDAAD KA KHOON


MERI MEHBOOB! UNHEIN BHI TAU MOHABBAT HO GI
JIN KI SANNAYEE NE BAKHSHI HAI ISE SHAKL-E-JAMEEL
UNN KE PYARON KE MAQAABIR RAHE BE NAAM-O-NAMOOD
AAJ TAK UNN PE JALAYEE NA KISI NE QANDEEL

YEH CHAMAN-ZAAR, YEH JAMNA KA KINARA, YEH MAHAL
YEH MANAQQASH DAR-O-DEEWAR, YEH MEHRAB, YEH TAAQ
EK SHAHANSHAH NE DAULAT KA SAHARA LE KAR
HUM GHAREEBON KI MOHABBAT KA UDAAYA HAI MAZAQ

MERI MEHBOOB! KAHIN AUR MILA KAR MUJH SE