Urdu Afsana

urdu afsana, Urdu nasar ka sab se ta-ra qui-yaafta form hai aur iss Ki badaulat Urdu nasar kahi'n se kahi'n paunch gai hai.

Urdu ke paye ke afsano'n mein Naya Qanoon, Mozel, Babu Gopinath, Kaali Shalwar, Balcony, Kaalu Bhangi, Naani Ki Naani, iss ghar se uss ghar Tak, Anndaata, Garam Coat, Seeta Haran, Laajwanti, Kafan, Mahalakshmi Ka Pul, Anandi, Apne Dukh Mujhe De Do, Toba Tek Singh, Chauthi Ka Joda, Aapa, Manzil Manzil, Gadadiya, Aakhri Insaan, Nazara Darmiyan Hai, shaamil hai'n.

Inn afsano'n ka muqabla duniya Ki kisi bhi zabaan Ki kahaniyo'n se kiya jaa sakta hai.

Meri bekhudi... Chakbast

Meri bekhudi hai woh bekhudi ke khudi ka waham-o-gumaa'n nahi'n
Yeh suroor-e-saaghar-e-mai nahi'n, yeh khumar-e-khwab-e-giraa'n nahi'n

Yeh hayat-e-aalam-e-khwab hai, na azaab hai na sawaab hai
Wahi kufr-o-dee'n mein kharab hai jise ilm-e-raaz-e-jaha'n nahi'n

Woh zamee'n pe Jin ka tha dabdaba, ke bula'nd arsh pe naam tha
Unhe'n falak ne mita diya, ke mazaar Tak ka nishaa'n nahi'n 

Majaz by Jazbi

Aaj ek jaada'h-e-pr-pech ka raahi gum hai
Ek hareef-e-alam la-manta hi gum hai

Ek saudaii-e-taameer-e-gulista'n mafqood
Ek Awaara-e-toofan-e-tabahi gum hai

Ek dahakta hua shola nahi'n maikhane mein
Ek mahakte hui sarshar nigaahi gum hai

Husn waalo'n ki jabeeno'n ka ujaala ojhal
Ishq waalo'n ke naseebo'n ki siyahi gum hai

Ahtiyaat

Chalo, hatao woh qissey tau kab ke khatam huye
Jab apne dil ko hatheli mein le ke phirte thay
Aur ab hamara yeh aalam hai sar jhukaye huye
Iss ahtiyaat se hum dosto'n se milte hai'n
Ke ab tau itni bhi himmat nahi'n ke dhoka khaye'n 

Ghazal by Mohsin Zaidi

Hai'n sar pe yu'n hi kai aasman mere liye
Ek aur dhu'nd ki chaadar na taan mere liye

Mujhe khyal ki rau badh ke rok leti hai
Hai sadd-e-raah tau meri udaan mere liye

Agar usi ki tarah la-makaan mai'n bhi hu'n
Woh phir bana gaya kyu'n makaan mere liye

Zameen paao'n ke neeche se le gaya lekin
Woh sar pe chod gaya aasman mere liye

Bahaar Aaii Faiz Ahmed Faiz

Bahaar aaii tau jaise yak baar
Laut aaye hai'n phir adam se

Woh khwab saare shabaab saare
Jo tere ho'nto'n pe marr mitey hai'n

Jo marr ke har baar phir jiye hai'n
Nikhar gaye hai'n gulab saare

Jo teri yaado'n se mushk-boo hai'n
Jo tere ushshaq  ka lahuu hai'n

Ubal pade hai'n azaab saare
Jo band aankho'n mein kho gaye thay

Jo sard nabzo'n mein so rahe thay


Malaal-e-ahvaal-e-dostaa'n bhi
Khumar-e-aaghosh-e-MADD-o-shaa'n bhi
Ghubaar-e-khatir ke baab saare
Tere hamare sawaal saare
Jawab saare

Bahaar aaii tau khul gaye hai'n
Naye sire se hisaab saare

Kaifi Azmi ki shayeri

" Awaara sijde " ke pesh lafz mein Faiz Ahmed Faiz ne likha hai " Kaifi ki shayeri ka mizaaj kadakpan se aashiqana hai. Lekin ghanaiyah shayeri satahi takallufat aur masnoo'ii zebaisho'n se Kaifi ne bohot kam sarokaar rakha. Gham-e-Jaana'n ka zikr ho ke Gham-e-Dauraa'n ka----  bosa-e-lab ki baat ho ke bosa-e-zanjeer ki, Kaifi baat hamesha khari karte hai'n "

Kaifi ki jamaliyati hiss bohot tez  aur bohot shaista thi, yahi wajah hai ke woh chaahe kisi siyasi mauzoo par qalam uthatey ya zulf-o-kaakul ki baat chedtey ya kisi badi shakhsiyat ko mauzoo-e-sukhan banatey, unn ke ash'aar mein aisa rachao paida ho jaata tha, jo mahaaz zabaan-o-bayan par qudrat ki wajah se nahi'n paida ho sakta hai, balke " dil-e-pur-khoo'n ki gulabi " aur zauq-e-jamaal ki " masti-o-sarshari " se hi zinda-o-Javed ho sakta hai.

" Naya Husn ", " Ek Bosa ", " Nazraana " na sirf Khoobsoorat nazme'n hai'n balke Kaifi Saheb ke shayerana mizaj ko samajhne mein bhi madadgaar saabit hoti hai'n.

" Awaare Sijde " mein baaz shaharo'n aur shakhsiyato'n par bhi Kaifi Saheb ki nazme'n shaamil hai'n. Maslan:
" Nehru " , " Lenin " , "Taashqand " , " Moscow " waghairah. Yeh shayeri ke mauzoo nahi'n ho sakte lekin inn nazmo'n mein Kaifi Saheb ne apne classicki mizaj, hissas zehan se  har mauzoo ko she'rr ke saa'nche dhaal diya hai, aur inn nazmo'n' ko adabi tasaaneef ki shakal Di hai.

Do She'rr by Iqbal Azeem

1. Safar pe nikle hai'n hum poore ahtemaam ke saath
    Hum apne ghar se kafan saath le ke aaye hai'n

2. Ab hum bhi sochte hai'n ke bazaar garm hain
    Apna zameer bech ke duniya khareed le'n

Aji pehle AAP by Raja Mehdialy khan

" Aji rakhiye jannat ke dar mein qadam
"Aji pehle AaAp "
" Aji waah pehle na jaaye'n ge hum "
" Aji pehle AAp "
" Aji baat iss mein takalluf ki kya
  Qudoom-e-Mubarak badhaye'n zara
   Aji chaliye, ruk jaaye'n gi sab jagah
" Aji pehle AAP "
" Bhaii pehle AAP "
 Aji badh bhi chukiye khuda ke liye
  Sabhi ab tau jannat mein hai'n jaa chuke
  Na ab mujh se kahiye khuda ke liye
 " Aji Pehle AAP "

Ghalib ki Farsi shayeri

taqdeer ki sitam-zareefi dekhiye ke Ghalib jo sirf apni farsi shayeri par fakhr kartay thay aur apne urdu ash'aar ko " na'ng-e-mann ast " kehte huye hiqaarat ka muzaahira karte thay. aaj unhe'n urdu ash'aar ki badaulat hi duniya ke azeem sho'raa mein shumaar kiya jaata hai.

ab agar Mirza Ghalib apne Farsi kalaam par iss qadar fakhr karte hain tau sawal yeh paida hota hai ke Iran mein unn ke kalaam ko kyun nahin saraaha gaya aur Irani naqqad jo Amir Khusrau ko ek zabardsat Hindustani Farsi-go shayer tasleem karte hain, Mirza Ghalib ke ash'aar se naa-waqif kyun hain.

Uss ki wajah hai ke Ameer  Khurau uss daur ke shayer hain jab umraa-o-raoosa, sho'raa-o-tulbaa-o-auliya sab Farsi par dastaras rakhte thay. Iss liye Ameer Khusrau ki zindagi mein hi khud hindustaniyon ne unn ke kalaam ko apnaya aur hind-o-iraan ke beech aane-jaane ke musalsal silsilo'n ki wajah se unn ke4 kalaam ki shohrat Iraan tak jaa pahunchi. iss ke ilaawa, Ameer Khusrau khud ek imaanm sukhan hain. unn ke kalaam mein bhi zyada-tar S'aadi aur Nizaami jaise mash'hoor-o-m'aaroof Irani sho'raa ka asar paaya jaata hai.

meri raaye mein Ghalib ke Farsi kalaam ke maqbool na hone ki wajoohat yeh hain;
1. khud Ghalib ke zamaane mein Farsi ka daur-e-iqtedaar khatam ho chuka tha aur Farsi ki navkhez aur navjawan beti Urdu raajsinghasan par brijmaan ho chuki thi.
2.yeh ek kadwi saccchaii hai keunneeswi'n sadi mein angrezo'n ki siyasat ki bina par Iran aur Hindustan ke beech aana-jaana kam ho chuka tha.

3.teesri wajah thi ke khwaja hafiz shirazi ne Farsi mein ghazaql ko jis oonchaii tak pahunchaya, uss oonchai tak khud Iran ka koi ghazal shayer kabhi nahin pahunch saka.
4. Ghalib ke daur tak Qaseede aur Masnavi dono ki hi maqbooliyat dum tod chuki thi aur isi liye Ghalib ki achchi masnaviya'n kisi darje tak pahunch hi nahin paaii'n.