urdu poetry... josh

soz-e-gham de ke mujhe, uss ne yeh irshaad kiya
jaa tujhe kashmakash-e-dahar se azaad kiya

woh karen bhi tau kin alfaaz mein tera shikwa
jin ko teri nigah-e-lutf ne barbaad kiya

dil ki choton ne kabhi chain se rehne na diya
jab chali sard hawa, main ne tujhe yaad kiya

itna maanoos hun fitrat se, kali jab chatki
jhuk ke main ne yeh kaha, mujh se kuch irshaad kiya

mujh ko tau hosh nahin, tum ko khabar ho shayed
log kehte hain ke tum ne mujhe barbaad kiya