urdu poetry.......josh malihabadi....3

aastan par jab kisi kaafir ke jhuk jaata hai dil
apne sajde ka, haram ko hukm farmaata hai dil

aane waala hai yakayak kya masarrat ka pyam
baithe-baithe aaj kyun mera bhara aata hai dil

sach bata, aye humnasheen! kya ishq isi ka naam hai
saans ke humrah seene se udaa jaata hai dil

aah, yeh duniya-kahan hai maut o kambakht maut
mera iss veeran aabadi mein ghabrata hai dil

urdu poetry.......josh malihabadi.3

jahannum sard hai jannat ke dar khulwaye jaate hain
sar-e-mahshar pujari husn ke bulwaye jaate hain

ghazab hai yeh ada unn ki dam-e-arayesh-e-gusu
jhuki jaati hain aankhen, khud-ba-khud sharmaye jaate hain

koi hudd hi nahin iss ahtram-e-aadmiyat ki
badi karta hai dushman aur hum sharmaye jaate hain

bohot jee khush hua aye humnasheen kal josh se mil kar
abhi agli sharafat ke namoone paaye jaate hain

rdu poetry........josh malihabadi..2

dil pe woh zakhm khaye hain ke na pooch
lutf bhi woh uthaye hain ke na pooch

unn ki raftar ne zamaane mein
aise fitne jagaye hain ke na pooch

urdu poetry.......josh malihabadi

dil ki choton ne kabhi chainn se rehne na diya
jab chali sard hawa, main ne tujhe yaad kiya

itna maanoos hun fitrat se, kali jab chatki
jhuk ke main ne yeh kaha, mujh se kuch irshaad kiya

meri har saans hai iss baat ki shahid aye maut
main ne har khauf ke mauqe pe tujhe yaad kiya

mujh ko tau hosh nahin, tum ko khabar ho shayed
log kehte hain ke tum ne mujhe barbaad kiya

KUCH DIN TAU BASO........

KUCH DIN TAU BASO MERI AANKHON MEIN
PHIR KHWAB AGAR HO JAAO TAU KYA

KOI RANG TAU DO MERE CHEHRE KO
PHIR ZAKHM AGAR MEHKAO TAU KYA

EK AAINA THA SO TOOT GAYA
AB KHUD SE AGAR SHARMAO TAU KYA

MAIN TANHA THA MAIN TANHA HUN
TUM AAO TAU KYA NA AAO TAU KYA

JAB DEKHNE WAALA KOI NAHIN
BUJH JAAO TAU KYA JAL JAAO TAU KYA

khizaan se seena bhara ho...saabir vaseem

khizaan se seena bhara ho lekin tum apna chehra gulab rakhna
tamaam taabeer uss ko dena aur apne hisse mein khwab rakhna

har ek zameen se har aasman se har ek zamaan se guzarte rehna
kahin pe taare bikher dena kahin koi maahtaab rakhna


yeh zindagi tau safar hai saabir safar mein jab bhi kisi se milna
tamaam sadme bhulate rehna mohaal ho ga hisaab rakhna

hum bin yaar ....abid

hum bin yaar bhi jiye hain
marne ke bade jatan kiye hain

khoon-e-vafa se kuch hina se
kya rang bahar ne liye hain

gulshan mein ajab hawa chali
phoolon ne hont see liye hain