Ghazal 2 Gopal Krishan Shafaq

Kya hi andaz hai unn aa'nkho'n ke behkaane ka
Raasta bhool gaye rind bhi mai khaane ka

Wahi shokhi, wahi Khushboo, wahi gulrez ada
Mausam-e-gul mein bhi hai andaz tere aane ka

Dil mein rehte ho magar aa'nkho'n se ojhal ho kar
Kis se seekha yeh andaz sitam dhaane ka

Hasrat-o-yaas ki tasveer bana rehta hai
Haal dekha nahi'n jaata tere deewaane ka

Uss ko laazim hai ke dil apna sambhale rakhe
Hausala jis ko na ho ishq mein gham khaane ka

Zindagi hai tau havaadis ka gila kyu'n ho Shafaq
Zindagi naam hai sholo'n se guzar jaane ka