jameel gulrays says so: 2015

Internet par har jagah Urdu shayeri ka air nazar aata hai. Jo Urdu padhna-likhna bhi nahi'n jaante woh bhi mujhe Urdu ke sabaq padhane lage hai'n.

Khair, mai'n kehna yeh chaah raha Hun ke Urdu shayer, nazm ke ilaawa Urdu nasr bhi apne mein jawab aap hai.

Ab se koshish rahe gi ke aap sab ka parichay Urdu nasr se bhi kara saku'n, yeh silsila shuru karte hai'n Urdu ke afsaane se...

Thursday, July 30, 2015

Ghazal Fareeda Lakhani Farah

Kisi se koi shikayet na kuch gila rakhiye
Daraaz sirf mohabbat ka silsila rakhiye

Khyal-o-khwab mein hi uss se raabta rakhiye
Khirad se kuch tau junoo'n ka maamla rakhiye

Dilo'n ki baat dilo'n tak rahe behtar hai
Zabaan khol kar kyu'n apna muddua rakhiye

Khud apne zabt ka daaman na choot jaaye
Qareeb jaa ke bhi kuch, faasla rakhiye

Friday, July 24, 2015

Ghazal Azra Parveen

Ugta naya Ken par lagta hai
Ab mujhe khud se darr lagta hai

Mere bachche ab hansne lage hai'n
Ab mujhe yeh ghar, ghar lagta hai

Nanhi ha'nsi ke saath tau har dukh
Phoolo'n ka bistar lagta hai

Meri godd ka nat-khat bachcha
Haran kabhi bander lagta hai

Boo'nd si bitiya ka lehja bhi
Kabhi kabhi saagar lagta hai

Wednesday, July 22, 2015

Ghazal Krishan Gautam

Bandishe'n gawaraa thi'n kuch na kuch tau peene par

Rok ab lagi hai kyu'n maikasho'n ke jeene par?

Aasma'n se shikwo'n ka haq tau har kisi ko hai

Kis ne zakhm dekhe hai'n aasma'n ke seene par

Khwahisho'n ki mat poocho, tez hai'n kataaro'n se

Anginat kharaashe'n hai'n dil ke iss nageene par

Ishq hi ko laazim hai dekhe rang-dhang apne

Kyu'n ho koi moetriz husn ke qareene par

Kya kisi ki baato'n mein aa gaye ho tum Gautam?

Baam par thay jaa rahe, ruk gaye ho zeene par !

Ghazal Nalini Vibha Naazli

Nawazish apni mere naam kar de!
Mujhe apna aseer-e-daam kar de!

Rasaii bakhsh apne dar ki mujh ko!
Mera aaghaz khush-anjaam kar de!

Mera fann hai tera marhoon-e-minnat
Ise maqbool-e-khaas-o-aam kar de!

Ata kar sabr, uss ke baad beshak
Balaaye'n saari mere naam kar de!

Karam kar aye khuda! Iss be-nawa par
Madawaa-e-gham-o-aalaam kar de!

Bana le khaak mujh ko apne dar ki
Khuda waalo'n mein mera naam kar de!

Saturday, July 18, 2015

Ghazal 3 Gopal Krishan Shafaq

Iss shahar ka woh shakhs jo tamgho'n se saja hai
Muddat se vazeero'n ke qadam choom raha hai

Jo sookhe huye pedo'n ka ambaar laga hai
Iss daur ki sitasat ka yahi faiz hua hai

Aane ko maseeha koi aaye bhi tau kya ho
Beemar-e-mohabbat ki dawa hai na dua hai

Kya uss ka bigaade gi bhala gardish-e-dauraa'n
Jo gardish-e-aflaak se sau baar lada hai

Khud apni museebat mein bhi rota hai akela
Woh shakhs jo auro'n ki museebat par hansa hai

Taameer kiye jis ne mahal auro'n ki khatir
Toote huye chappar mein woh sardi se mara hai

Jamhoor jise kehte hai'n yeh all-e-siyasat
Changez-parasti hi ka ek naam naya hai

Woh noor Shafaq jis talashi ho azal se
Woh noor abhi shab ke libaade mein chupa hai

Friday, July 17, 2015

Ghazal 2 Gopal Krishan Shafaq

Kya hi andaz hai unn aa'nkho'n ke behkaane ka
Raasta bhool gaye rind bhi mai khaane ka

Wahi shokhi, wahi Khushboo, wahi gulrez ada
Mausam-e-gul mein bhi hai andaz tere aane ka

Dil mein rehte ho magar aa'nkho'n se ojhal ho kar
Kis se seekha yeh andaz sitam dhaane ka

Hasrat-o-yaas ki tasveer bana rehta hai
Haal dekha nahi'n jaata tere deewaane ka

Uss ko laazim hai ke dil apna sambhale rakhe
Hausala jis ko na ho ishq mein gham khaane ka

Zindagi hai tau havaadis ka gila kyu'n ho Shafaq
Zindagi naam hai sholo'n se guzar jaane ka

Ghazal Gopal Krishan Shafaq

Yu'n jalaana doosre ko ek parwaane ke baad
Kya kaho ge tum khuda se yeh sitam dhaana ke baad

Be piye mai ki burai Shaikh Ji achchi nahi'n
Jo bhi kehna ho so kahiye nosh farmaane ke baad

Paarsai ki yeh baate'n shaam tak tau theek hai'n
Kuch asar rakhti'n nahi'n hai'n shaam dhal jaane ke baad

Rehbaro'n se rahzani ka unn ko darr rehta nahi'n
Jo bana lete hai'n raasta thokare'n khaane ke baad

Raahate'n kyu'n dhoo'ndte ho khwahisho'n ki bheed mein
Koi shai milti nahi'n jungle mein kho jaane ke baad

Har taraf dushwariya'n, na-kaamiya'n, maayusiya'n
Hosh mein rehta main kaise hosh mein aane ke baad

Ru-ba-ru ho kar Shafaq se baat bhi karte nahi'n
Yaad kar ke roiye ga uss ke marr jaane ke baad

Saturday, July 11, 2015

Jameel Gulrays Ghazal 4

Dil jalaana koi mazaaq nahi'n
Kaaba dhaana koi mazaaq nahi'n

Mukhtasar zindagi mein sai'nkdo'n gham
Jhel jaana koi mazaaq nahi'n

Haal, aye talkhi-e-hayat na pooch
Muskurana koi mazaaq nahi'n

Tujh se waabasta rahe Jo lamhe
Bhool jaana koi mazaaq nahi'n

Wednesday, July 8, 2015

Ghazal 3 Jameel Gulrays

Zindagi naghma hai, be-saakhta gaate chaliye
Waqt ke saaz se awaaz milaate chaliye

Hum ne maana ke hai'n kuch raah mein rodey, patthar
Thokare'n shaan se unn ko lagaate chaliye

Har ada waqt ki ho jaaye gi rehbar aap ki
Uss ko har gaam pe mehboob banaate chaliye

Zindagi ek tasalsul hai, na rukne paaye
Har ghadi iss ki baharhaal nibhaate chaliye

Ghazal 2 Jameel Gulrays

Na jaane kyu'n dil mein toofan bapa hai
Ke jaise aaj unn ka saamna hai

Bohot kuch hum he dekha-suna hai
Dikhaava jis ka, uss ka hi khuda hai

Bhala koi yaha'n hai na bura hai
Hai jo bhi waqt ke haatho'n hua hai

Tawoqqo kis se rakhte hai'n Jameel aap
Zamaana tau bohot badla hua hai

Thursday, July 2, 2015

Yaadgaar-e-Ghalib Altaf Hussain Haali 2

Mirza ke khaas khaas shagird aur dost jin se betakallufi thi aksar shaam ko un ke paas baith'te thay. Aur Mirza suroor ke aalam mein uss waqt bohot pur-lutf baate'n kiya karte thay. Ek roz Meer Mehdi Majrooh baithe thay, aur Mirza palang par pade karaah rahe thay. Meer Mehdi paao'n daabney lagey. Mirza ne kaha " bhai tu sayyad-zaada hai,mujhe kyu'n gunaahgar karta hai? " unho'n ne nahi'n maana aur kaha aap ko aisa hi khayal hai tau pairr daabney ki ujrat de dijiye ga " Mirza he kaha " haa'n iss ka muzayeqa nahi'n " jab woh pairr daab chuke tau unho'n ne ujrat talab ki. Mirza ne kaha " Bhaiyya kaisi ujrat? Tum ne mere paao'n daabey, mai'n ne tumhare paise daabey, hisab barabar hua."

Yaadgar-e-Ghalib, Altaf Hussain Hali

Ek sohbat mein Mirza, Meer Taqi Meer ki taareef kar rahe thay. Shaikh Ibrahim Zauq bhi maujood thay, unho'n ne Sauda ko Meer par tarjeeh di, Mirza ne kaha " Mai'n tum ko Meeri Samjhta tha magar ab maloom hua ke aap Saudai hai'n "

Makaan ke jis kamre mein Mirza din bhar baith'te uth'te thay woh makaan ke darwaaze ki chat par tha aur uss ke ek jaanib ek kothri tung-o-taareek thi, jis ka dar iss qadar chota tha ke kothri mein bohot jhuk kar jaana padta tha, uss mein hamesha farsh bicha rehta tha aur Mirza aksar garmi ke mausam mein 10 baje se 3-4 baje tak waha'n baith'te thay. Ek din jabke Ramzan ka maheena aur garmi ka mausam tha, Maulana Azurda'h theek dopahar ke waqt Mirza se milne chale aaye. Uss waqt Mirza saheb usi kothri mein kisi dost ke saath chausar ya shatranj khel rahe thay. Maulana bhi wahi'n pahunche aur Mirza ko Ramzan ke maheene mein chausar khelte huye dekh kar kaha " hum be hadees mein padha tha ke Ramzan ke maheene mein Shaitan muqeed rehta hai, magar aaj hadees ki sehat mein tarad'dud paida ho gaya "Mirza ne kaha " qibla! Hadees bilkul sahi hai,magar aap ko maloom rahe ke woh jagah jaha'n Shaitan muqeed rehta hai woh yahi kothri tau hai ".

.....to be continued

Wednesday, July 1, 2015

Hum Sab Rishtedaar Hai'n

Bachpan mein ek kahani Padhi thi, Jo kuch yu'n hai:
America ke New York shahar mein do dost raha karte thay, dono hi dher saari daulat kama kar aish ki zindagi jeena chahte thay lekin unn ki har koshish nakaam ho jaaya karti thi.

Maheeno'n ke soch-vichaar ke baad ek dost ko dher saari daulat kamaane ka ek idea soojha. Uss ne apne dost se kaha " hum ek quiz contest organise kare'n ge, shahar ke sab se bade stadium mein aur darshako'n se $100 perti vyakti fees le'n ge. Agar hamare quiz contest mein koi bhi teen prashno'n ka sahi Uttar de Gaya tau usse $5 Billion ka inaam mile ga "

Doosre dost ne poocha " Aur yeh $ 5 Billion hum laaye'n ge kaha'n se ? "

Pehle dost ne kaha " Hum aise sawal pooche'n ge, jis ka jawab pratispardhiyo'n ke paas ho ha hi nahi'n "
" jaise ? " doosre dost ne poocha

Pehle dost ne kaha " jaise 1963 mein Brazil ka HRD minister kaun tha? "

Dono'n khushi-khushi karyakaram ki tayyari mein jut gaye, khoob vigyapan kiye gaye, dhero'n PR event huye aur quiz waale din stadium khacha-khach bhar gaya. Dono dost apni saphalta par be had Khush thay.

Contest shuru hua, pehla pratispardhi jawab nahi'n de paaya, doosre ka bhi wahi haal hua aur yeh Silsila 13th pratispardhi ke aane Tak jaari raha.

Terahave'n partispardhi se pehle dost ne pooch " aapka naam kya hai? "

Pratispardhi ne jawab diya " John Britannica "

" Aap ka naam tau Encyclopedia jaisa hai " doosre dost ne kaha

" Jee Encyclopedia mere daddy ne shuru kiya tha aur aajkal mai'n uss ka editor hu'n "

Dono dosto'n ne chintit ho kar ek-doosre ko dekha.

Pehle sawaal ka sahi jawab mila, doosre prashn ka bhi uttar sahi tha.

Ab dono dosto'n ki pareshani badh gai. Kuch der sochne ke baad, doosre dost ne aa'nkho'n hi aa'nkho'n hi mein pehle dost se kaha " mai'n ise sambhal lu'n ga.

Pehle dost ne kaha " Mr Britannica, teesre prashn se pehle, mai'n kuch general sawaal aap se pooch sakta hu'n? "

" Zaroor " Mr Britannica ne jawab diya

Pehle dost ne poocha " Mr Britannica, hum sab paida kaise huye? "

Mr Britannica ne kaha " Wahi Adam aur Eve ki Kahani "

Doosre dost ne kaha " aap ko iss baat par pakka vishwas hai? "

Mr Britannica ne kaha " Jee, pakka vishwas hai "

Doosre dost ne kaha agar aap ki baat maan li jaaye tau hum sab ek-doosre ke rishtedaar huye"

Mr Britannica ne kaha " Jee Bilkul rishtedaar huye "

Doosre dost ne kaha " Mr Britannica, aap ne iss contest ke rules regulation tau padhe hi hon ge ke hamaara koi bhi rishtedaar iss contest mein bhaag nahi'n le sakta hai aur aapko hamara rishtedaar hone ke kaaran disqualify kiya jaata hai "

Yeh kahani iss liye yaad aai kyu'n ke aise tark television news channels par lagataar sunai de rahe hai'n. Jis ko hum imaandari samajhte thay uss ki dhajjiya'n udti dikhai de rahi hai'n.

Aaj lag raha hai ke hum bewaqoof thay Jo imaan ki raah par chalte rahe.

Ghazal Sahir Hoshiyarpuri

Meri chup ko gila samjhe dua ko woh fugha'n samjhe

Na uzr-e-khamshi samjhe na andaz-e-bya'n samjhe

Kisi se kya shikayet apni khush-fehmi ka maatam hai

Wahi na-meharba'n nikla jise hum meharba'n samjhe

Mere sijdo'n pe apni azmat qurban kar daale

Mere sijdo'n ki azmat ko jo tera aasta'n samjhe

Hamari khush-khayali hi vabaal-e-jaa'n hui Sahir

Wahi saabit hua rehzan jise hum meharba'n samjhe

Unwan Chishti Ghazalaai

Mere shaano'n pe un ki zulf lehrai tau kya ho ga
Mohabbat ko khunak saaye mein nee'nd aai tau kya ho ga

Paresha'n ho ke dil tark-e-talluq par hai aamada'h
Mohabbat mein yeh soorat bhi na raas aai tau kya ho ga

Sar-e-mahfil woh mujh se be-sabab aa'nkhe'n churate hai'n
Koi aise mein tohmat unn ke sar aai tau kya ho ga

Suna sakta hu'n unn ko apni barbaadi ka afsana
Phir uss ke baad unn ki aa'nkh bhar aai tau kya ho ga

Ghazal Jameel Gulrays

Gulshan uljhe, sehra uljhe
Waqt ke haatho'n kya kya uljhe

Adnaa uljhe, aala uljhe
Uljhi duniya se kya kya uljhe

Hum ne jise samjha tha nasheman
Tinke se hai tinka uljhe

Shayed apni wafa yaad aai
Baithe hai'n saraapa uljhe

Saturday, June 27, 2015

Be-Basi Parveen Shakir

barish ne zamee'n par paao'n dhara

Khushboo khanki, ghunghroo chanka

Lehrai hawa, behki barkha

Kya jaaniye kya mitti se kaha

Dar aai shareer mein ek nadiya

Kis orr chali, dayya dayya !

Kis ghaat lagu'n re purwaiyya

Saara jag jal aur mai'n nayya!

Parwarda'h Parveen Shakir

Log kehte hai'n in dino'n chup hai

Mera qaafile --

Ke uss ke khanjar ko

Dhone waali kaneez

Chhup chhup kar

Ab lahu ko zabaa'n se chaat'ti hai !

Gila Parveen Shakir

aye khuda
Meri awaaz se sahiri cheen kar
Tu ne saa'npo'n ki basti mein kyu'n mujh ko paida kiya !

Ghazal Parveen Shakir

jaga sake na tere lab, lakeer aisi thi
Hamare bakht ki rekha bhi Meer aisi thi

Yeh haath choome gaye, phir bhi be-gulab rahe
Jo rut bhi aai, khizaa'n ke safeer aisi thi

Woh mere paao'n ko choone jhuka tha jis lamhe
Jo maangta usse de deti, ameer, aisi thi

Shahadate'n mere haq mein tamaam jaati thi'n
Magar khamosh thay munsif, nazeer aisi thi

Kutar ke jaal bhi sayyad ki raza ke baghair
Tamaam umr na udti, aseer aisi thi

Phir uss ke baad na dekhe visaal ke mausam
Judaiyo'n ki ghadi, chashn-geer aisi thi

Bas ek nigaag mujhe dekhta, chala jaata
Uss aadmi ki mohabbat faqeer aisi thi

Rida ke saath lutere ko zaad-e-reh bhi diya
Teri farakh-dili mere veer aisi thi

Wednesday, June 24, 2015

ghazal Vaali Aasi

Mohabbato'n ki ada ke siwa kuch aur nahi'n
Faqeer ke paas dua ke siwa kuch aur nahi'n

Yaqee'n na ho tau kabhi aazma ke dekh hame'n
Hamare paas vafa ke siwa kuch aur nahi'n

Hame'n khabar hai ke sach bolna zaroori hai
Magar nateeja saza ke siwa kuch aur nahi'n

Dhadak raha hai Jo dil ban ke tere seene mein
Mere azeez, khuda ke siwa kuch aur nahi'n

Jidhar chiraagh liye jaa rahe ho aye Vaali
Udhar tau yaar hawa ke siwa kuch aur nahi'n

Ghazal Mahir-Ul-Qadri

Jaam bhar-bhar ke woh chalkaye tau kuch she'rr Kano
Zindagi raqs mein aa jaaye tau kuch she'rr kaho

Brahaman paas nahi'n aaye tau kuch she'rr kaho
Shaikh mahfil se nikal jaaye tau kuch she'rr kaho

Mere maahaul pe taari hai t'assub ka ghubar
Aadmi saaf nazar aaye tau kuch she'rr kaho

Rooh-e-insaa'n pe hai gard-e-gham-e-dauraa'n ab tak
Chhand badli se nikal aaye tau kuch she'rr kaho

Ghazal Shameem Jaipuri

Har ek lamha shab-e-gham hai kya kijiye
Ummeed-e-sehar bohot kam hai kya kijiye

Khayal-e-doori-e-manzil tau kuch nahi'n aye dil
Magar hayat bohot kam hai kya kijiye

Tumhari yaad mein aalam ko bhool baitha hu'n
Tum hi batao yeh aalam hai kya kijiye

Sukoon-e-dil se mujhe dushmani nahi'n lekin
Bohot azeez tera gham hai kya kijiye

Samo liye hai'n zamaane ke gham tabassum mein
Zamaana iss pe bhi barhum hai kya kijiye

Meri khushi se mere dosto'n ko gham hai Shameem
Mujhe bhi iss ka bohot gham hai kya kijiye

Friday, June 12, 2015

Khumar Baarabankavi Ghazal 3

haal-e-dil un ko sunate jaaiye

Shart yeh hai muskurate jaaiye

Aap ko jaate na dekha jaaye ga

In chiraagho'n ko bujhate jaaiye

Dushmano'n se pyaar hota jaaye ga

Dosto'n ko aazmate jaaiye

Shukriya lutf-e-musalsal ka magar

Gaahe-gaahe dil dukhate jaaiye

Raushni mehdood ho Jin ki Khumar

Unn chiraagho'n ko bujhate jaaiye

Khumar Baarabankavi Ghal 2

hum unhe'n woh hame'n bhula baithe
Do gunaahgar zehar kha baithe

Aa'ndhiyo, jaao ab karo aaram
Hum khud apna diya bujha baithe

Jii tau halka hua magar yaaro
Ro ke hum luff ga'nwa baithe

Be-saharo'n ka aasra hi kya
Ghar mein ghabraye, dar pe as baithe

Hashr ka din abhi hai door Khumar
Aap kyu'n zaahido'n mein aa baithe

Khumar Baarabankavi Ghazal 1

yeh misr'aa nahin hai vazeefa mera hai
Khuda hai mohabbat, mohabbat khuda hai

Kahu'n mai'n yeh kaise ke woh bewafa hai
Mujhe uss ki majbooriyo'n ka pata hai

Hawa ko bohot sarkashi ka nasha hai
Magar yeh na bhoole diya bhi diya hai

Nazar mein hai jalte makaano'n ka manzar
Chamakte hai'n jugnu tau dil kaa'npta hai

Guzarta hai har shakhs chehra chupaye
Koi raah mein aaina rakh gaya hai

Kaha'n tu khumar aur kaha'n jurm-e-tauba
Tujhe paarsao'n ne behka diya hai

She'rr Ke Sau Rang 2

chal aye humdum, zara saaz-e-tarab ki ched bhi sun le'n
Agar dil baith jaaye ga tau uth aaye'n ge mahfil se
Saaqib Lakhnavi

Suna hai phir mere zauq-e-nazar ki aazmaish hai
Unhe'n manzoor phir qalb-o-jigar ki aazmaish hai
Saghar Nizami

Kuch safeeno'n ke muqaddar mein ho sahil shayed
Har safeene ke muqaddar mein kinaara tau nahi'n
Mohsin Kaakorvi

Na de ilzam bad-masti ka, ek uftaad tha saaqi
Mera girna, bhare saghar ka chakna-choor hona
Shaad Azimabadi

Tumhari qasam haasil-e-zindagi thay
Woh kuch din jo hum tum ne baahaum guzaare
Lutfa Rizwan

Jab se baitha hu'n mai'n raazi ba mashiyyat ho kar
Mujh pe aafat bhi koi aai tau rehmat ho kar
Majzoob

Mai'n khaak-nashee'n hu'n mera maslak hai faqeeri
Duniya mein koi arsh-nashee'n hai tau mujhe kya
Rifat Sultan

Hai nai nai si manzil hai'n naye naye se rehbar
Kahi'n tu bichad na jaana mere saath-saath chal ke
Khumar Baarabankavi

Baad parvaano'n ke hoti gai'n shame'n bhi khamosh
Kaun karta hai shaheedan-e-wafa ka maatam
Bashar Nawaz

Diya khamosh hai lekin kisi ka dil tau jalta hai
Chale aao jaha'n tak raushni maloom hoti hai
Nushoor Wahidi

Lab band, gum havaas, tahayyur nigah mein
Tasveer ban gaya hu'n teri jalwa-gaah mein
Kaif Tonki

Sach ghate ya badhe tau sach na rahe
Jhoot ki koi intiha hi nahi'n
KishnBihariNoor

Itna tau mujhe yaad hai, kuch uss ne kaha tha
Kya uss ne kaha tha? yeh mujhe yaad nahi'n
Nisar Ahmed

Soz Sikandarabadi

Munh na takiye mera waqt hai mukhtasar, zindagi maut se ab badal jaaye gi
Aakhiri waqt hai muskura dijiye kuch tau dil ki tamanna nikal jaaye gi

Mauj sar kham kare, sard toofa'n pade khud-bakhud meri jaanib kinaara badhe
Aap agar nakhuda ban ke aa jaaye'n tau kishti-e-dil bhanwar se nikal jaaye gi

Teri pehli nazar jhoom kar jab uthi khoon badhne laga zindagi hans padi
Kya khabar thi wahi ek pal ki ha'nsi ek din aa'nsuo'n mein badal jaaye gi

Har kali ko hai maaloom yeh falsafa pooch lene ki zahmat gawara kare'n
Aap naaza'n hai'n iss aarizi cheez par ek din yeh jawani bhi dhal jaaye gi

Naaseha teri har baat manzoor hai phir bhi mai'n apni fitrat se majboor hu'n
Dekh kar charkh par kaali kaali ghata kya karu'n ga jo niyat badal jaaye gi

Aqal hairan hai dil pareshan hai jis ka imkaa'n nahi'n baat ho gi woh kya
Kya yeh mumkin hai aye Soz iss daur mein yeh zamee'n aasma'n ko nigal jaaye gi

Thursday, June 11, 2015

Ghazal Raaz Illahbadi

aashiya'n jal gaya gulista'n lut gaya, ab qafas se nikal kar kidhar jaaye'n ge

Itne maanoos sayyad se ho gaye, ab rihaii mile gi tau marr jaaye'n ge

Aur kuch din yeh dastoor-e-maikhana hai tishna-kaami ke yeh din guzar jaaye'n ge

Mere saaqi ko nazre'n uthaane tau do jitne khaali jaam hai'n sab jaam bhar jaaye'n ge

Aye naseem-e-sahar tujh ko unn ki qasam unn se jaa kar na kehna mera haal-e-gham

Apne mitne ka gham tau nahi'n hai magar darr yeh hai unn ke gesu bikhar jaaye'n ge

Ashk-e-gham le ke aakhir kaha'n jaaye'n hum aa'nsuo'n ki yaha'n koi qeemat nahi'n

Aap hi apna daaman badha dijiye warna yeh moti zamee'n par bikhar jaaye'n ge

Maut awaaz deti hai shayed unhe'n jaane waale hai'n duniya se ahl-e-wafa

Raaz, aise mein koi ghazal ched de qaafile zindagi ke thahar jaaye'n ge

Ghazal Khaleel-ur-Rehman Azmi

kaisi junoo'n Ki fasal hai ab ke kaisa hai yeh ishq ka mausam
Maut ka nasha halka halka, gham ki hawaye'n maddham maddham

Mai'n bhi wahi hu'n tu bhi wahi hai phir bhi na jaane kaisi kami hai
Meri aa'nkhe'n veera'n veera'n tera chehra mubham mubham

Koi kahani ched ke chup hai beete huye lamho'n ki khushboo
Meethi meethi dil mein kasak hai jaise adhure vasl Ki shabnam

Aks sa apna chod gaya hai jab se koi husn sarapa
Saari fazaye'n raqs-e-musalsal saari khalaye'n naghma-e-paiham

Shola-e-gul ke nazaaro'n se aur aa'nkho'n ki pyas badhi
Jii mein hai palko'n pe utha ke rakh lu'n ik ik Qatar-e-shabnam