Tabsara Nigari ka Funn by Raza Naqvi Waahi ( Tanz )

Woh jo hotel mein chakh rahe hai'n kabab
Saamne rakh ke ek dabeez kitaab

Aaiye bataoo'n kya hai'n aap
Maahir-e-funn-e-tabsara hai'n aap

Ek ghante mein dus kitaabo'n par
Aap likhte hai'n tabsara Farr Farr

Adab-o-falsafa-o-ilm-o-kalaam
Saare mauzuu aap ke hai'n ghulam

Laakh moti sahi kitaab magar
Sar-e-waraq dekhte hi ek nazar

Aap ka khaama-e-gauhar afsha'n
Hone lagta hai dafatan jaulaa'n

Balke aksar hua hai aisa bhi
Boo kitaabo'n ki door se soo'nghi

Aur jhat se sambhal kar khaama
Fikr ko funn ka de diya jaama

Yeh bhi mash-hoor hai ke aap ka funn
Inn kitaabo'n par bhi hai khaama zan

Tab'aa hone ki baat door rahi
Batan-e-funnkar mein jo gum hai'n abhi

Asal mein tabsar nigari ka
Funn bhi ek khel hai madaari ka