AJEEB HAALAAT

LEHRON KA DAUR HAI
PAANI KA NAAM NAHIN
BISORTI SURATO, SUNO
YAHAN TUMHARA KAAM NAHIN

CHAAND SO RAHA HAI
SITAARE KHEL RAHE HAIN
SACH BOLNE WALE SAARE
DUKH HI DUKH JHEL RAHE HAIN

PED UDAAS HAIN YAHAN
IMAARATEIN HANS RAHI HAIN
JO GHALAT HAIN AAJ, YAHAN
LOG KEHTE HAIN,WAHI SAHI HAIN

CHOR SEENA TAANE CHALTE
SIPAHI CHUPTE PHIR RAHE HAIN
JO CHOOTE NAHIN NASHE KO
RAAH MEIN WAHI GIR RAHE HAIN

KAISA DAUR HAI YEH AYE KHUDA
ULTI GANGA BEH RAHI HAI
AANSOO SASTE SACHCHAI KE
ZINDAGI KHUD UNN PE HANS RAHI HAI

AAJ-KAL

ISHQ KA GHAM ISS ZAMANE MEIN KISKO NASEEB
ROTIYON KE GHAM MEIN AB TAU GHULE JAATE HAIN LOG

KIS MEIN HIMMAT ISS ZAMANE MEIN GAREBAAN-CHAAK HO
ISS ZAMANE MEIN BHALA KAPDA KAHAN PAATE HAIN LOG

ISHQ MEIN AB AAH AUR ASHKON KA HUNGAMA KAHAN
RAAT KO MEHFIL MEIN DATT KAR RAQS FARMAATE HAIN LOG

QAIS AUR FARHAAD KA QISSA PURANI BAAT HAI
ISS ZAMANE MEIN KAHAN GHAR CHOD KAR JAATE HAIN LOG

YEH KYA HO RA HAI

NAFRAT KA ZAHAR GHUL CHUKA HAI
BAT CHUKE HAIN BEWAQOOF BHI AQLAMAND BHI

ANDHERA GEHRA HI HOTA JAA RAHA HAI
ROSHNI KE HAIN SAARE RAASTE BAND BHI

TUM HINDU HO MAIN MUSLMAN
TUM ZAALIM HO MAIN MAZLOOM

YAHI FIKR BIKHAR RAHI HAI CHAAR SU
WARNA TUM DAYALU HO MAIN BHI MASOOM HUN

DARINDE KIS QAUM MEIN NAHIN HOTE
MAZHAB INSANIYAT KA SABAQ SIKHATA HAI

LEKIN AADMI BAD-ZAAT HAI
DHARAM KA HAR PAATH BHOOL JAATA HAI

URDU ORTRY...TOPIC; SAQI

NASHA PILA KE GIRAANA TAU SAB KO AATA HAI
MAZA TAU TAB HAI KE GIRTON KO THAAM LE SAQI...IQBAL

MAI BHI HAI, MEENA BHI HAI, SAGHAR BHI HAI, SAQI NAHIN
JEE CHAHTA HAI LAGA DEN AAG MAIKHANE KO HUM...NAZEER AKBARABADI

ZAAHIDO, TUM NE MUTLIQ NA PI, HUM NE JEE BHAR KE PI
TUM BHI MAR JAO GE, HUM BHI MAR JAYEN GE

URDU POETRY...TOPIC; LIFESPAN ( UMR )

SUBAH HOTI HAI SHAAM HOTI HAI
UMR YUNHI TAMAAM HOTI HAI

YEH MOHLAT-E-KAM JISE KEHTE HAIN UMR
MAR-MAR KE GHARZ TAMAAM KI HAI MAIN NE...MEER TAQI MEER

UMAR SAARI TAU KATI ISHQ-E-BUTAAN MEIN MOMIN
AAKHIRI WAQT MEIN KYA KHAAK MUSALMAN HON GE...MOMIN

TERI NAZAR

TERI NAZAR SHARAB HAI KUCH-KUCH
MERI NIYYAT KHARAB HAI KUCH-KUCH

KAATE NAHIN KAT-TI HAI RAAT , AAJ
SHAB-E-FIRAAQQ, AZAAB HAI KUCH-KUCH

DIL TODNA HAR KISI KA JANAAB
BAN RAHA HAI, AB, SAWAB KUCH-KUCH

INTEZAARR

INTEZAAR JAARI HAI
PATTE ZARD HO KAR GIR PADE  HAIN
PHOOL MURJHA GAYE HAIN
TEHNIYAN KAMZOR HO GAYEE HAIN
KHIZAAN AA CHUKI HAI
LEKIN TUM NA AAYE HO

JHAKKAD SE SOOKHE PATTE
UDNE LAGE HAIN
GARD-O-GHUBAAR NE
AASMAN PAR CHHAA KAR
CHANDNI KO UDAAS KAR DIYA HAI
TAARE BE-NOOR HO GAYE HAIN
LEKIN TUM NA AAYE HO

KONPALEIN PJOOTEIN
HARYALI MEIN
RAN-BIRANGE ROOP BIKHRE
TITLIYAN MANDRANE LAGEEN
KALIYAN MUSKURANE LAGEEN
PARINDON KE NAGHMON SE
VEERANE GOONJ UTHE
BAHAR AA GAYEE
LEKIN TUM NA AAYE HO

AB JO LAUTE HO
TAU
KISI AUR KA DAAMAN THAME HO
HAMEIN BHOOL GAYE HO